O le SUIGA o le Faavae o Samoa ua taoto ai nei i le Palemene lona faitauga faalua, toe lava la o le Pasia o ona teuteuga ua tuuina atu i le Komiti FaaPalemene, e pei ona faataatia ai le lafo e le afioga i le Palemia, Tuilaepa Lupesoliai Sailele Malielegaoi.

O le suiga o le a i ai le Faavae o Samoa, e mafua mai i le faatomuaga o le tatou Faavae poo le Faavaa, lea o loo i ai upu,o Samoa o se atunuu Kerisiano.  O loo talia le faauigaina o lenei suiga e le Malo, aua o loo faataga pea i le Faavae le malosi o le aia tatau saoloto a le tagata ia, poo ai le Atua e fia tapuai i ai, o loo i le Vaega 11 o le Faavae. Le aia tatau poo le salotoga o le tagata e pule ai i le lotu e lotu ai. O loo taga  faasoloatoa i le taimi nei. Aua o isi lotu, e ta’u mai Iesu, ae ese lava foiliga o latou ituaiga Iesu, e le tutusa ma talitonuga faaKerisiano…E Iesu pulepule solo. O se mataupu ua gugulu ai nei finagalo o le atunuu, ma ua le fiafia nisi i lenei suiga ua faia e le malo, faapea o le a faailogalanu, pe afai o le a faauigamoni le Upu Kerisiano.

Peitai, o lea na faamaonia e le Palemia i le fonotaga mulimuli a le Palemene o le 2016, ma o le sa’o tonu lea o le suiga o le a sui ai le Faavae o Samoa. O le a matua tuu i totonu o le Fatu o le Faavae o Samoa, le Faaupuga lenei. O Samoa o se atunuu Kerisiano, e Faavae i le Atua le Tama, le Alo ma le Agaga Paia.

O le Polokalame o le Faavae i le Atua Samoa, o loo faasalalauina  e le leitio le Uaga o Faamanuiaga ma le KTV, Televise o le Malo le Atua. O loo taiulu lenei Polokalame e le susuga i le Aposetolo Viliamu Mafoe, i lona faatalanoaina o nisi o faafeagaiga o le Ekalesia Worship Centre, faapea faafeagaiga o le Soofaatasi le Tasi ia Keriso. O nei finagalo uma, e talosia ai finagalo o le atunuu ma le Malo, i le suiga o le a i ai le Faavae, lea a uma lenei iloiloga, ona toe lipoti lea i le Palemene ma pasia ai, i lona faitauga faatolu.