TOGALAUAPIGA AUTALAVOU WORSHIP CENTRE APIA
NAUNAU E TE NOFO I LE MAMALU O LE ATUA
O le aso Lulu, aso 12 o Aperila na amata ai le Togalauapiga a tupulaga Talavou a le Ekalesia o le Ogatotonu o Tapuaiga, Worship Centre i Apia. E tolu aso se’i pa’ia le aso Toonai aso 15 o Aperila. Na faaautu lenei Togalauapiga e faapea, Ia naunau e te nofo i le mamalu o le Atua. DWELL IN THE PRESENCE OF THE LORD.
O le malae o le Kolisi a Faleata na faataunuu ai lenei faamoemoe, ma na faaautu sauniga uma i le Mamalu o le ALII, aemaise o puapuaga na feagai ma lo tatou Alii Faaola o Iesu Keriso. O le aso Faraile na aofaga potopoto ai le Ekalesia mo le sauniga fai faatasi ma le Togalauapiga ma le autalavou .
O sauniga e masani ai le Ekalesia i tausaga taitasi, ma o le faamamafa lava, ina ia lagona e tupulaga le taua o le maliu o Iesu, ma lona toto na faamaligiina e aofia ai ma lona Toetu Manumalo mai le oti ma le Tuugamau. Ia saga faaleleia ai le mafutaga a tupulaga talavou ma le Alii, suia o latou olaga, mai le tele o suiga fou ma metotia televavave faanei-onapo, ua lutia ai i faafitauli le soifua o nisi o tupulaga, ma aafia ai o latou ola FaaleAgaga.
Sauniga i le aso Faraile ole aso Maliu, na faatino ai e le autalavou le tala i le faasatauroina o Iesu ma lona maliu. Na lagona le ootia, loimata maligi le toatele na auai, ona ua toe faatepa mafaufauga i le mauga i Korokota, e lei faigofie le totogiina o le tau o le tagata agasala, na totogi lava i le ola ofoina atu ma le soifua faitaulaga o Iesu.
O le lauga, na saunia e le susuga i le Aposetolo Viliamu Mafoe, o le Taitai Aoao o le Ekalesia Worship Centre World Wide i Samoa ma le lalolagi.
Faaalia e Viliamu Mafoe, na amata lava ona agasala le uluai tagata o Atamu ma Eva, ona ua le usiusitai, ua la ‘ai le Laaufaasaina. Na tutuli ese ai loa i laua mai le Faatoaga o Etena, sa na o le saoloto e ola ma ‘aai ai.
Autu o le lauga..E le faigofie le Tau na totogi e Iesu, e toe faafoi ai tatou i le Mamalu o le Atua.
Faaalia e Viliamu Mafoe..Mai le agasala a le uluai tagata, ua finagalo ai loa le Atua, e saunia se togiolaina o le lalolagi, lea na mafua ai le afio mai o Iesu le Faaola o le lalolagi.
Eperu 9: 11 – 15
Lea na valoia ai e le Au Perofeta, o le a fanau mai le tama, e i lona ua le malo. Fanau mai le tama ( IESU ) na te tu’imomomo le ulu o le gata, o Satani lea. Finagalo le Atua, se’i vagana le toto e sausauina ai agasala a le tagata. E tatau ona i ai se Toto e magalo ai le tagata. O le Toto lava o Iesu Keriso, ua ia faamagaloina ai agasala a le lalolagi.
Na oo ina faaosoosoina Iesu e Satani i le vao, peitai, na matua faiaina ai lava le tiapolo.
O le maliu o Iesu, na faaalia e Viliamu Mafoe, na sau Iesu e faatoilalo le Tiapolo. (2) Totogi le tau o le agasala.
O le isi itu taua, o le faamalieina o le Amiotonu a le Atua, na matua masa’a ai le Toto o Iesu. ( Eperu 9 : 21 )
A le masa’a le Toto, e le magalo le agasala.
(Eperu :9) O le itu e ao ona silafia, na alu lava Iesu e ave lona Toto i le Atua i le Falefetafa’i i le fatafaitaulaga a le Atua. E tatau ai ona talia o Ia ma faatuatua i lona Suafa, e ala i le salamo, ona magalo lea o agasala.
( 1 Ioane : 3 :8..Lea ua afio mai Iesu e faaumatia galuega a le tiapolo. ( Luka 4 :8..Ua afio mai foi Iesu na te faaumatia galuega a le tiapolo.
E fitu meatetele taua o loo i ai i le Mamalu o le Atua. 1..O Faamanuiaga a le Atua. 2..Puipuiga a le Atua. 3…Faauuga a le Agaga Paia. 4…Filemu. E maua ai le malologa o le loto ma le mafaufau. 5…Folafolaga a le Atua. 6..Galuega ma Tofi mai le Atua. Pei ona faamatalaina e Viliamu Mafoe, e amata mai ina ua agasala le tagata, sosoo ma le avea ma tagata paia, sosoo i le avea ma tamafai, sosoo i le avea ma suli, sosoo i le avea ma ositaulaga, ae faai’u ina ua avea i tatou ma Tupu. Osana. Viia le Alii.
Ma le vaega mulimuli e 7..O le faamoemoe o le Atua mo le tagata.
Faaalia e le susuga i le Aposetolo Viliamu Mafoe, e maua e le tagata nei vaega taua e 7, pe afai o loo i ai pea i le Mamalu o leAtua. TATOU NAUNAU LOA E NONOFO I LE MAMALU O LE ATUA.
IOE…. E le faigofie le Tau na totogi e Iesu, e toe faafoi ai tatou i le Mamalu o le Atua.
Soifua ma ia Manuia. Tusia : Leapai Sosopo Leapai.
